Entèvansyon Nimewo 1 22 novanm 2000
Ouvriye, ouvriyèz nan Gwasmal Sen Rafayèl,
Jounen jodi a, Sendika nou an, Sendika Ouvriye Gwasimal Sen
Rafayèl, ap pale ake nou. Jan nou tout konnen, Sendika nou an LEGAL e li
anrejistre nòmalman nan Afè Sosyal Pòtoprens. Poutan, ABI nou toujou ap sibi
nan plantasyon an poko janm fini e se chak jou nou gen pou BATAY pou defann dwa
nou kont reprezantan direksyon an ki kontinye vle pase yo anba pye, fè nou sèvi
bwa dan. Fòk nou tout klè: Sendika nou an, se ZAM nou pou nou kapab BATAY
ANSANM, pou nou FÈ RESPEKTE DWA NOU.
Nan premye entèvansyon sa a, Sendika a ap poze pwoblèm
DIKTATÈ SA YO RELE JEAN-MARIE ST FLEUR, MÒD KONTWOLÈ SA A KI DERESPEKTE TRAVAYÈ
PLANTASYON AN, DERESPEKTE SENDIKA A, PRAN PÒZ WA L. Semenn dènyè, kareman,
Jan-Mari atake yon manm sendika a, joure l pandan li sou pye zoranj la, manke l
dega, imilye l, menase l. Jan Mari mande travayè a sa k te ba l keyi zoranj
lan. Lè ouvriye a montre l se ouvriye li ye, l ap keyi zoranj lan tankou tout
ouvriye yo, Jan Mari fè l desann pye zoranj lan, di l “flank pat li atè”
e menm mande travayè a goumen kareman.
Ki pwoblèm Jan Mari menm? Gwo ble a te fini, lame d Ayiti
te fini. Ki kote kalite gwo ponyèt sa a sòti?! An reyalite, si nou byen gade, n
ap wè aklè: PWOBLÈM JAN-MARI SE SENDIKA A. Dayè, li di sa aklè: “o wi, kòm
kounye a, se nou ki chèf, se nou ki ap kòmande. Moun bèt pa dirije moun lespri.
Sendika se moun bèt ki ladann. Se politik blan an Sendika ye.”. Jan-Mari konnen
fen e byen ak Sendika, reny diktatè l sou Gwasimal FINI! Li pap sa kontinye fè
e defè, mete moun li vle keyi lè l vle, si l vle, jan l vle. TI KATÈL A
JAN-MARI A FINI! Kounye a, se DWA TOUT OUVRIYE GWASIMAL KI AP GENYEN POU YO
RESPEKTE, Jan-Mari ap tounen nan plas li etanke yon senp anplwaye, LI CHITE KÒM
WA GWASIMAL! Ki fè: JAN-MARI AP VOYE PYE! Se nòmal.
Jan-Mari, n ap tou di w: si se pou sa monchè, OU FÈK
KOUMANSE VOYE PYE! Paske WI: nou fèk kare batay menm! E nou deside mete yon fen
nan abitrè w la! Ansanm revandikasyon nou yo deja nan men mezon an, e tèt nou
kole ANSANM pou nou jwenn satisfaksyon. Peyi d Ayiti, se yon peyi ki gen lwa e
GWASIMAL S.A. GENYEN POU LI RESPEKTE LALWA! Zafè moun ap mouri nan plantasyon
an, tankou sa te rive kanmarad nou semenn pase a, fanmi l pa rive touche
dedomajman, nou pap sitire l pyès!
E depi kounye a n ap tou avèti Afè Sosyal ke nou dispoze
tanmen yon arè travay nan jou k ap vini yo pou pwoteste kont reny abitrè sa a e
egzije respè lis revandikasyon nou an.
ABA GWO PONYÈT
DIKTATÈ WA GWASIMAL YO!
VIV LIT SENDIKA NOU
AN!