27 Novanm 2000
Pou: Daniel Zephir, direktè Mànye-Lapostòl Okap
Sot nan: Sendika Ouvriye Mànye-Lapostol (S.O.M.L.)
Objè: SWEN SANTE nan etablisman an.
Mesye,
Sendika a ap ekri w jounen jodi a sou kesyon youn nan
revandikasyon nou te poze ane dènyè ki te sanse twouve solisyon men ki an
reyalite rete poze menm jan an. Se pwoblèm jan ka maladi ouvriye yo pa rezoud
anndan an. Sendika a te deja poze pwoblèm sa a ake ou men nou wè jiskaprezan
sitiyasyon an rete menm jan.
Vreman vre, mis ki nan dispansè a enfòme nou fòmèlman ke
li la sèlman pou mete pansman – tout lòt ka: maladi, tèt fè mal, grip, pwoblèm
men moun k ap keyi ak koupe yo, elatriye... pa pou li. Sa vle di dispansè sa a
se yon fotokopi li ye, li vid nèt e konsa tou li nil paske li pa gen
anyen ki nesesè pou rezoud pwoblèm sante nou ki grav anpil. Sa ki pi di, doktè
ki sanse asiyen a sante travayè yo, Dr. Albert nan Okap, enfòme nou ke, pou de
rezon ki relve de direksyon an, li gen difikilte asire nou swen sante nou
bezwen yo tou.
Konsa tou, sendika a te mande w konstwi yon kwizin pou
abrite machann manje yo nan jaden yo, yon fason pou garanti sante nou yon lòt
fwa ankò, ou te di w te dakò, men nou remake sa pa janm fèt. Ki fè manje
kontinye ap prepare nan kondisyon ki pa gen sante ladann.
Devan pwoblèm sila yo, n ap pwopoze yon chita pale nan
plantasyon an jedi 30 novanm lan, a 10 zè nan maten, ak prezans ni mis
la, ni doktè Albert, epitou Afè Sosyal. Sa ap tou pèmèt yon vizit plantasyon an
fèt pou kapab idantifye kote pwoblèm sante n ap poze yo chita vre.
An menm tan, depi li posib, Sendika a ta renmen tou
pwofite okazyon sa a pou poze ak ou kèk lòt pwoblèm ki ap ban nou gwo kè sote,
sitou pwoblèm prezans lapolis nan plantasyon an ak sistèm radyo-kominikasyon ak
biwo Okap ki se yon nesesite pou travay la.
Salitasyon,
Pou Sendika a, Julsaint
Joseph, Sekretè
cc: BRN/MAST
Dr. Daniel
Albert
Gwoup Asistans
Sosyal (G.A.J)